എറണാകുളം കുണ്ടന്നൂരിൽ ജനിച്ച് മണിക്കൂറുകൾ മാത്രം പ്രായമായ ആൺകുഞ്ഞിനെ വഴിയരികിൽ ഉപേക്ഷിച്ച നിലയിൽ കണ്ടെത്തി. പുലർച്ചെ ഒരു മണിയോടെ ഫോറം മാളിന് സമീപമുള്ള തട്ടുക്കടയ്കക് സമീപത്ത് നിന്നും കുഞ്ഞിന്റെ കരച്ചിൽ കേട്ട നാട്ടുകാർ പോലീസിനെ വിവരമറിയിക്കുകയായിരുന്നു.പോലീസ് പട്രോളിങ് വാഹനം സ്ഥലത്തെത്തി പരിശോധന നടത്തിയപ്പോൾ കണ്ടെത്തിയത് ജനിച്ച് മണിക്കൂറുകൾ മാത്രം പ്രായമായ ആൺകുഞ്ഞിനെയാണ്. പോലീസ് സ്ഥലത്തെത്തി കുഞ്ഞിനെ ഏറ്റെടുക്കുകയും തുടർന്ന് ‘അമ്മത്തൊട്ടിലിലേക്ക്’ മാറ്റുകയും ചെയ്തു.കുഞ്ഞിന്റെ ആരോഗ്യനില തൃപ്തികരമാണെങ്കിലും ഡോക്ടർമാരുടെ നിരീക്ഷണത്തിലാണ്. കുഞ്ഞിനെ ഉപേക്ഷിച്ചവരെ കണ്ടെത്താനായി പോലീസ് അന്വേഷണം ആരംഭിച്ചിട്ടുണ്ട്.
പ്രദേശത്ത് സിസിടിവി ക്യാമറകൾ ഇല്ലാത്തതിനാൽ കുഞ്ഞിനെ ഉപേക്ഷിച്ചത് ആരെന്നോ കാരണം എന്തെന്നോ ഇനിയും വ്യക്തമല്ല. സമീപ പ്രദേശങ്ങളിലെ വിവരങ്ങൾ ശേഖരിച്ചും ആശുപത്രികളിലെ പ്രസവരേഖകൾ പരിശോധിച്ചും അന്വേഷണം പുരോഗമിക്കുകയാണെന്ന് പോലീസ് അറിയിച്ചു.അതേസമയം, ഉപേക്ഷിക്കപ്പെടുന്ന നവജാത ശിശുക്കൾക്ക് സുരക്ഷിത അഭയകേന്ദ്രമാകേണ്ട എറണാകുളത്തെ അമ്മത്തൊട്ടിൽ കഴിഞ്ഞ മൂന്ന് മാസമായി പ്രവർത്തനരഹിതമാണ്. സെൻസർ തകരാറിനെ തുടർന്ന് സംവിധാനം അടച്ചിട്ടിരിക്കുകയാണെന്നാണ് അധികൃതരുടെ വിശദീകരണം. എന്നാൽ ഇത്രയും കാലമായിട്ടും തകരാർ പരിഹരിക്കാത്തത് ഗുരുതര വീഴ്ചയാണെന്ന വിമർശനം ഉയരുന്നുണ്ട്. കുഞ്ഞിനെ ഉപേക്ഷിച്ചവരെ കണ്ടെത്താനായി പോലീസ് അന്വേഷണം ആരംഭിച്ചിട്ടുണ്ട്.
