കൊച്ചിയിൽ ഡിജെ പാർട്ടികൾക്കായി ലഹരിവിതരണം ചെയ്യുന്ന സംഘത്തിലെ പ്രധാന കണ്ണി ഡാൻസാഫിന്റെ പിടിയിലായി. പശ്ചിമ ബംഗാൾ സ്വദേശിയായ നയൻ മണ്ഡലാണ് എട്ട് കിലോ കഞ്ചാവുമായി അറസ്റ്റിലായത്. ഓർഡർ പ്രകാരം ട്രെയിനിൽ കഞ്ചാവ് കടത്തിക്കൊണ്ടുവന്ന് വിതരണത്തിന് കൊണ്ടുപോകുന്നതിനിടെയാണ് ഇയാൾ പിടിയിലാകുന്നത്.
കഴിഞ്ഞ ദിവസം അഞ്ച് കിലോ കഞ്ചാവുമായി പിടിയിലായ രണ്ട് യുവാക്കളുടെ ഫോൺ കേന്ദ്രീകരിച്ച് നടത്തിയ അന്വേഷണത്തിൽ നിന്നാണ് നയൻ മണ്ഡലിനെക്കുറിച്ച് പോലീസിന് വിവരം ലഭിച്ചത്. കൊച്ചിയിലെ ലഹരിമാഫിയ ശൃംഖലയുമായി അടുത്ത ബന്ധമുള്ളയാളാണ് നയൻ. നിശാപാർട്ടികൾക്ക് പുറമെ സ്കൂൾ, കോളേജ് വിദ്യാർത്ഥികൾക്കും ഇയാൾ ലഹരിവിതരണം ചെയ്യാറുണ്ടെന്ന് പോലീസ് പറഞ്ഞു. ഒഡീഷയിൽ നിന്നാണ് നയനിന്റെ നേതൃത്വത്തിലുള്ള സംഘം കഞ്ചാവ് കേരളത്തിലെത്തിക്കുന്നത്. കൊച്ചിയിൽ കഴിഞ്ഞ ഒരാഴ്ചയ്ക്കിടെ അമ്പത് കിലോയിലേറെ കഞ്ചാവാണ് ഡാൻസാഫ് സംഘം പിടികൂടിയത്.
