സംസ്ഥാനത്ത് മഴയുടെ ശക്തി കുറയും;മത്സ്യബന്ധനത്തിന് വിലക്കുണ്ട്

സംസ്ഥാനത്ത് ഇന്ന് മഴയുടെ ശക്തി കുറഞ്ഞേക്കും. ഇന്ന് മുതൽ എവിടെയും റെഡ് ഓറഞ്ച് അലേർട്ടുകൾ പ്രഖ്യാപിച്ചിട്ടില്ല. ഒറ്റപ്പെട്ട ശക്തമായ മഴയ്ക്ക് സാധ്യതയുള്ളതിനാൽ വടക്കൻ കേരളത്തിൽ അഞ്ച് ജില്ലകളിൽ യെല്ലോ അലേർട്ട് പ്രഖ്യാപിച്ചു. മലപ്പുറം മുതൽ കാസർഗോഡ് വരെയുള്ള ജില്ലകളിലാണ് യെല്ലോ അലേർട്ട്. തിരുവനന്തപുരം മുതൽ പാലക്കാട് വരെയുള്ള ജില്ലകളിൽ മഴ മുന്നറിയിപ്പ് നൽകിയിട്ടില്ല. ഉരുൾപൊട്ടൽ മണ്ണിടിച്ചിൽ സാധ്യതയുള്ള സ്ഥലങ്ങളിൽ നിന്ന് ആളുകൾ മാറി താമസിക്കണം എന്ന് ദുരന്തനിവാരണ അതോറിറ്റി അറിയിച്ചു. അതേസമയം, കേരള -ലക്ഷദീപ് – കർണാടക തീരങ്ങളിൽ ഇന്നും ബുധനാഴ്ചയും മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥാ വകുപ്പ് അറിയിച്ചു.
കനത്ത മഴയ്ക്കിടെ താമരശ്ശേരി ചുരം ആറാംവളവിൽ മണ്ണിടിഞ്ഞു.ഇന്നലെ രാത്രി ഏഴു മണിയോടെയാണ് ചുരത്തിൽ മണ്ണിടിച്ചിൽ ഉണ്ടായത്. വലിയ വാഹനങ്ങൾ വരുമ്പോൾ ഒരു വശത്തേക്ക് മാത്രം ഗതാഗതം ക്രമീകരിക്കേണ്ടി വരുന്നതിനാൽ വാഹനങ്ങൾ മന്ദഗതിയിലാണ് ചുരം റോഡിലൂടെ കടന്നുപോകുന്നത്. ചുരം റോഡ് വഴിപോകുന്ന യാത്രക്കാർ ആവശ്യമായ സമയം മുൻകൂട്ടി ക്രമീകരിച്ച് യാത്ര പുറപ്പെടണമെന്ന് ചുരം സംരക്ഷണ സമിതി അറിയിച്ചു.