കോട്ടയം വേമ്പിൻകുളങ്ങര ശ്രീ മഹാവിഷ്ണു ക്ഷേത്രത്തിൽ ഭജന അവതരിപ്പിക്കുന്നതിനിടെ ക്രിസ്തീയ ഭക്തിഗാനം ആലപിച്ചതിൽ നന്ദഗോവിന്ദം ഭജൻസിന് പിന്തുണയുമായി ക്ഷേത്ര കമ്മിറ്റി. സംഭവം വിവാദമാക്കേണ്ടതില്ലെന്നും ക്രിസ്തീയ ഭക്തിഗാനം പാടിയതിൽ തെറ്റില്ലെന്നും നട്ടാശ്ശേരി വേമ്പിൻകുളങ്ങര മഹാവിഷ്ണു ക്ഷേത്ര കമ്മിറ്റി പ്രസ്താവനയിൽ അറിയിച്ചു.
ഏപ്രിൽ 20ന് നട്ടാശ്ശേരി വേമ്പിൻകുളങ്ങര മഹാവിഷ്ണു ക്ഷേത്രോത്സവത്തിനിടെയാണ് സംഭവം. ‘ഈ പരദേവനഹോ’ എന്ന ഗാനമാണ് നന്ദഗോവിന്ദം ഭജൻസ് ഭക്തിസാന്ദ്രതയോടെ ആലപിച്ചത്. പരിപാടിക്ക് പിന്നാലെ നന്ദഗോവിന്ദം ഭജൻസിന്റെ സമൂഹമാധ്യമ അക്കൗണ്ടിൽ ഗാനാലാപനത്തിന്റെ വീഡിയോ പങ്കുവെച്ചു. വീഡിയോ വൈറലായതോടെയാണ് വിമർശനം ഉയർന്നത്. ക്ഷേത്രോത്സവത്തിൽ ക്രിസ്തീയ ഭക്തിഗാനം ആലപിച്ചതിന് എതിർപ്പുമായി ഒരു വിഭാഗം രംഗത്തെത്തുകയായിരുന്നു. സംഭവത്തിൽ രൂക്ഷ വിമർശനവുമായി ഹിന്ദു ഐക്യവേദി മുഖ്യരക്ഷാധികാരി കെ പി ശശികലയും രംഗത്തെത്തിയിരുന്നു. ചിക്കൻ മസാല നല്ലതാണ്, പക്ഷേ അത് പായസത്തിലിടരുതെന്നും ഇതൊരു വീട്ടമ്മയുടെ ഉപദേശമാണെന്നുമായിരുന്നു ശശികല പരിഹസിച്ചത്.
എന്നാൽ നന്ദഗോവിന്ദം ഭജൻസിനെതിരായ വിമർശനം അവസാനിപ്പിക്കണം എന്നാണ് ക്ഷേത്ര കമ്മിറ്റി ആവശ്യപ്പെട്ടിരിക്കുന്നത്. ഗ്രാമത്തിലുള്ള എല്ലാവരും വളരെ സൗഹാർദപരമായാണ് ജീവിക്കുന്നത്. ഇത്തരത്തിലുള്ള വിവാദങ്ങളിലൂടെ നിലവിലെ അവസ്ഥയെ തകർക്കരുതെന്നും ക്ഷേത്ര കമ്മിറ്റി ആവശ്യപ്പെട്ടു. വിമ‍ർശനങ്ങൾക്കെതിരെ നന്ദഗോവിന്ദം ഭ‍ജൻ ടീമും പ്രതികരണവുമായി രംഗത്ത് വന്നിരുന്നു. ആരുടെയും വിശ്വാസങ്ങളെയോ വികാരത്തെയോ വേദനിപ്പിക്കാൻ ഉദ്ദേശിച്ചിരുന്നില്ല എന്ന് നന്ദഗോവിന്ദം ഭജൻസ് വ്യക്തമാക്കി.
