വി ഡി സതീശൻ പിണറായി വിജയനെ വസതിയിലെത്തി കണ്ടു; സത്യപ്രതിജ്ഞയ്ക്ക് ക്ഷണിച്ചു

മുൻ മുഖ്യമന്ത്രി പിണറായി വിജയനെ വീട്ടിലെത്തി സന്ദർശിച്ച് നിയുക്ത മുഖ്യമന്ത്രി വി ഡി സതീശൻ. മുൻ സർക്കാരിന്റെ വികസന പദ്ധതികൾ തുടർന്നു കൊണ്ടുപോകുമെന്ന് പിണറായി വിജയന് വി ഡി സതീശൻ ഉറപ്പുനൽകി. ഇരുവരും ഒന്നിച്ച് മാധ്യമങ്ങളെ കണ്ടതും ശ്രദ്ധേയമായി.ഉച്ചയോടെയാണ് വി ഡി സതീശൻ പിണറായി വിജയന്റെ വസതിയിലെത്തിയത്. വീടിന് പുറത്തിറങ്ങി എത്തിയാണ് പിണറായി വിജയൻ അദ്ദേഹത്തെ സ്വീകരിച്ചത്. കൈകോർത്തും സൗഹൃദ സംഭാഷണങ്ങളോടെയും ഇരുവരും വീട്ടിനുള്ളിലേക്ക് പ്രവേശിച്ചു. തുടർന്ന് ഏറെ നേരം കൂടിക്കാഴ്ച നടത്തിയ ശേഷം ഒരുമിച്ച് ചായയും പങ്കിട്ടു.
കൂടിക്കാഴ്ചയ്ക്ക് ശേഷം ഇരുവരും ഒന്നിച്ചെത്തി മാധ്യമങ്ങളോട് സംസാരിച്ചു. മാധ്യമപ്രവർത്തകരുടെ തിരക്ക് കൂടിയതോടെ “സതീശനെ പോകാൻ അനുവദിക്കൂ” എന്ന് പിണറായി വിജയൻ പറഞ്ഞതും ശ്രദ്ധനേടി.കഴിഞ്ഞ നിയമസഭയിൽ മുഖ്യമന്ത്രിയും പ്രതിപക്ഷ നേതാവുമായി കടുത്ത രാഷ്ട്രീയ പോരാട്ടം നടത്തിയ ഇരുവരും ഇനി സ്ഥാനങ്ങൾ മാറി വീണ്ടും സഭയിൽ നേർക്കുനേർ എത്തും. എന്നാൽ രാഷ്ട്രീയ ഭിന്നതകൾക്കപ്പുറം വ്യക്തിപരമായ സൗഹൃദം തുടരുന്നുവെന്ന സന്ദേശമാണ് ഈ കൂടിക്കാഴ്ച നൽകുന്നത്.