തെന്നിന്ത്യൻ താരം തൃഷയുടെ തിരുപ്പതി ദർശനം തമിഴ്നാട് രാഷ്ട്രീയത്തിൽ വലിയ ചർച്ചയാകുന്നു. തമിഴ്നാട് നിയമസഭാ തെരഞ്ഞെടുപ്പിന്റെ വോട്ടെണ്ണൽ പുരോഗമിക്കവെയാണ് വിജയ്‌യുടെ രാഷ്ട്രീയ പാർട്ടിയായ തമിഴക വെട്രി കഴകത്തിന്റെ (TVK) വിജയത്തിനായി താരം തിരുപ്പതിയിൽ എത്തിയതെന്ന ചർച്ചകളാണ് സോഷ്യൽ മീഡിയയിൽ സജീവമായിരിക്കുന്നത്.
തന്റെ 43-ാം ജന്മദിനത്തിന്റെ തലേദിവസമാണ് തൃഷ ആത്മീയ യാത്ര നടത്തിയത്. ഞായറാഴ്ച രാത്രി തിരുപ്പതിയിലേക്കുള്ള യാത്രാ വീഡിയോ താരം ഇൻസ്റ്റാഗ്രാമിലൂടെ പങ്കുവെച്ചിരുന്നു. തിങ്കളാഴ്ച രാവിലെ തിരുപ്പതി ക്ഷേത്രത്തിൽ പ്രാർഥന നടത്തുന്ന താരത്തിന്റെ ദൃശ്യങ്ങൾ പുറത്തുവന്നു. ആരാധകരുടെ തിരക്കുകളിൽ നിന്ന് മാറി തികച്ചും ലളിതമായാണ് താരം ദർശനം നടത്തിയത്.
തെരഞ്ഞെടുപ്പ് ഫലം പുറത്തുവരുന്ന നിർണായക ദിനത്തിൽ തന്നെ തൃഷ ദർശനത്തിന് എത്തിയത് വിജയ്‌യുടെ പാർട്ടിയോടുള്ള ഐക്യദാർഢ്യമാണെന്ന് ഒരു വിഭാഗം ആരാധകർ അവകാശപ്പെടുന്നു. ഏപ്രിൽ 23ന് വോട്ട് രേഖപ്പെടുത്തിയ ശേഷം തൃഷ പങ്കുവെച്ച ഇൻസ്റ്റാഗ്രാം പോസ്റ്റും വലിയ ശ്രദ്ധ നേടിയിരുന്നു. തന്റെ ദീർഘകാല സുഹൃത്തും സഹപ്രവർത്തകനുമായ വിജയ്‌ക്കുള്ള രഹസ്യ പിന്തുണയാണ് ഇതെന്നാണ് ആരാധകർ അന്ന് വിലയിരുത്തിയത്.
ഈ വർഷം മാർച്ചിൽ ചെന്നൈയിൽ നടന്ന ഒരു വിവാഹ സത്കാരത്തിൽ വിജയ്‌യും തൃഷയും ഒന്നിച്ചെത്തിയ വീഡിയോകളും വൈറലായിരുന്നു. വിജയിയുടെ വിവാഹമോചന വാർത്തകൾക്ക് പിന്നാലെയായിരുന്നു ഈ പൊതുവേദിയിലെ സാന്നിധ്യം. 2025 ഡിസംബറിലാണ് വിജയ്‌യും ഭാര്യ സംഗീതയും വിവാഹമോചനത്തിന് അപേക്ഷ നൽകിയത്.
